AzQAC Cəbrayıl rayon bölməsi məktəblilər üçün "İlk Yardım Postu" tədbiri keçirib

AzQAC və BQXK-nın dəstəyi ilə Cəbrayıl rayon bölməsinin FMKD-nin aylıq müntəzəm fəaliyyətlərindən biri olan "İlk Yardım Postu" tədbiri uğurla həyata keçirilib. Tədbir Cəbrayıl rayonunun 11 saylı qəsəbəsində yerləşən Çərəkən kənd tam orta məktəbində təşkil olunub və məktəblilər üçün vacib praktiki biliklər təqdim edilib.
Tədbirin əsas məqsədi məktəbliləri ilkin tibbi yardım qaydaları ilə tanış etmək və onların fövqəladə hallarda düzgün reaksiya göstərmələrinə dəstək olmaqdır. Təlim zamanı iştirakçılara qanaxmanın dayandırılması, huşsuz şəxslərə ilkin yardım göstərilməsi, sınıq və burxulma hallarında nə edilməsi və digər vacib müdaxilə üsulları öyrədilib.
Mütəxəssislər tərəfindən interaktiv metodlarla keçirilən təlim məktəblilərin böyük marağına səbəb olub. Onlar əldə etdikləri bilikləri praktik olaraq tətbiq edib və müxtəlif vəziyyətlərdə necə davranmalı olduqlarını öyrəniblər.